Das si die aktuell 23 Manne vo mwb24.

D Reihefolg isch rein zuefällig und het nüt mit Wichtigkeit oder Können ztüe. Jede isch wichtig und nur dank jedem einzelne isch mwb24 das, wos äbä isch - e spezielle Männerchor.

Peter Hubacher, Dirigänt

Das isch der Hubi. Är isch scho meh aus 50 Jahr (!!!) Dirigänt bi mwb24. Immer (oder ömu fasch immer) guet gluunet mahnet är üs geng öppe chly dra, weniger z schnure u meh z singe. D Agogik sigi haut scho sehr wichtig. Und dä cheibe Sibner. Weme dä nid trifft, de tönts haut eifach wüescht. Aber "der Dirigänt isch uf sini Manne stouz" heissts im Lied "Üse Männerchor". Merci Hubi für ungloublechi 50 Jahr arrangiere, dirigiere und Wüsse vermittle.


Fritz Brandt, zwöite Bass

Ja, ohni Fridu würde zmningscht zwe im zwöite Bass ganz schön unger gah. Dank ihm tönt der zwöit Bass haut äbä so wiener tönt. Stimmsicher und mitere wäuts Erfahrig simer froh, ihn für die ganz töife Tön binis z ha.


Hans Sturzenegger, erste Bass

Der Housi isch eis vode wahre Urgestei vo mwb24. Im erste Bass hiuft är no bide meiste Uftritte tatchräftig mit, dases de ömu ja so tönt, wies mues töne. Eine vode eher ruhigere Charaktere i üsem Chor, aber wener sini Meinig seit, lost jede zue. Schön bisch immerno binis, Hans!


Andreas Lüthi, erste Bass

Der Res isch eine vode ganz wichtige Manne bi mwb24. Teu würde äuä sogar sägä, är sig der Wichtigst. Är isches nähmlech, wo immer schön derfür luegt, dasmer währete Probe ir Heufti immer es chüeus Bierli oder süsch öppis Flüssigs zur Hand hei. Ou im Vorstand isch är derby aus Bysitzer und hiuft, dä Verein ir Spur z haute. Und hei! - sitem 2019 ischer sogar id Reihe vode Soliste yträttä. Löhtnech la überrasche! Merci für Di Ysatz, Res.


Beat Beutler, erste Bass

Schouspieltalänt. Sänger. Presidänt. Das isch üse Beat - e Leader durch und durch. Au Jahr nid nume aus Sänger, sondern meistens o ir Houptroue vom Theater z bewundere. U sine Aasprache ir Pouse lost jede immer mit voller Ufmerksamkeit zue (meistens, oder ömu fasch meistens.) Es isch nid e eifache Huffe zum füere, aber der Beat macht das mitere riese Rueh und mit viu Fyngfüeu. Merci für Di Ysatz, Beat.


Thomas König, zwöite Bass

Der Tom. Me chane nid beschribe, me muesne erläbä. Gfüeuti 2 Meter 20 und gueti 80 kg puri Männlechkeit seckle da jewius über d Bühni u mache Stimmig bide rockigere und schnäuere Nummere. Aber är cha o ganz gfüeuvou und fyn. U ds Liecht heter im Griff wie ke zwöite. E wahri Erlüchtig. U wes de aube chly lang geit bis der Dirigänt zur Pouse lütet ume öppe es Hopfesmoothie cha näh, de wirder ganz langsam närvös.


Erwin Schneider, erste Tenor

Mit sire chraftvolle Stimm u sim ungloubleche Gfüeu bringt är nid nume die junge Dame ider erste Reihe zum schmeuze. "Der Winu - uh! - dä het der Wahn, es steckt ihm höch im Gring. Är streckt der Haus grad wiene Schwan, gseht är es härzigs Ding." So heissts im Lied "Üse Männerchor", wo nottabene är umgschribe het. mwb24 ohni Winu, das wär definitiv nüm mwb24.

Niklaus Sterchi, zwöite Tenor

Der Chlöisu isch es wyters Urgestei vo mwb24. Scho sit viune, viune Jahr chunnt är bis uf ganz weni Usnahme jede Donnsti Aabe ids Schueuhuus Wattewiu-Bangerte und singt us Liibeschräfte mit. Sini luschtigi Art u sini Erfahrig sy Gold wärt. Schön bisch o Du immerno binis, Chlöisu.


Hans Galli, zwöite Bass

Der Housi isch eine vom zwöite Bass. Aus "Meister des Vorhangs" treit är derzue by, dass Dir a üsne Uffüerige im Heistrich nüt verpasset, wo ufder Bühni obe louft. Das isch de mängisch gar nid so eifach wüu irgendeim no e blödä Witz z Sinn chunnt wome no chönnt verzeue. U natürlech treit är mit sire Stimmsicherheit massgäblechi Teile derzue by, dases im zwöite Bass unger kener Missverständnis git.


Thomas Barbey, erste Tenor

Der Thömu isch üses jüngste Mitglied; rein "dienstjahrtechnisch" gseh. Aus langjährige Dirigänt und Leiter vom Jodlerclub Hettiswil treit är massgäblech derzue by, dass o üsi Usflüg ids Jodelsegmänt guet töne. Aber o vo sire wäutsgrosse Erfahrig und sire wunderbare Stimm cha mwb24 super profitiere. Schön bisch bi üs, Thömu!


Beat Wermuth, erste Bass

Üse Copain. Mit sine super Qualitätä aus Moderator füert är sehr oft aus Redner dür üsi Konzärt u treit so derzue by, dass o die Teili zwüschede Lieder zumne nie längwilige Happening wärdä. Mau mitemne lockere Witz, mau mit tiefsinnige Sprüch oder o eifach bim Akünde vom nächstä Song chunnt ihm d Erfahrig aus Lehrer zguet.


Hansueli Werthmüller, zwöite Bass

"Glernt isch glernt" - mit däm Spruch het der Haneli scho mängisch füre ganz zwöit Bass gredt, we der Hubi aube fragt, obmer üsi Stimm gfunde heig. Mit sire erfrüschende Art und sim Schalk ide Ouge treit är massgäblech derzue by, dass die töife Stimme bi mwb24 mittlerwyle scho es igschwores Trüppli sy. Der Flachmaa, wo ade Konzärt im zwöite Bass umegreicht wird, macht ömu jewius e gäbig länge Haut bi ihm. Är isch zuedäm ou im Vorstand und het dert d Finanze unger sich, was gwüss kes eifachs Ressort isch. Aber Jahr für Jahr stimmt üses Kässeli u das spricht doch für ihn. Merci für Di Ysatz, Wägi.


Vincent Derungs, zwöite Tenor

"Die Pünkt uf dena Linia sind Nota. Dia sägat üs, wia ma sötti singa!" Am Vinc sy bündner Charme, syni Tacktgenauigkeit und syni Erfahrig mit dene schwarze Pünkt uf dene Notebletter sy Gold wärt. Dermit bringt är zwar mängisch die, wo lieber e chly wettä improvisiere, fasch e chly zur Verzwiiflig. Aber genau das bruchts! Wo chämtemer de härä, we aui eifach so tätä, wiesi wettä u niemer so tuet, wiener söt? So treit är sy Teil derzue by, dases äbä meistens de no cheibe guet tönt, wemer üsi Lieder singe. U wes ir Pouse e Schorle het, de ischer sowieso zfride.

Ernst Schmutz, erste Tenor

O der Aschi isch eine vo denä, wome fasch au Jahr nachde Konzärt no aus Schouspiler ufder Bühni darf bewundere. O d Bar a üsem Trysset-Fescht isch fescht i sire Hand. Är organisiert Jahr für Jahr, dases im separate Zäut änä immer gnue z Trinke het. Zudäm ischer im Vorstand aus Fähndrich ungerwägs u schrisst dermit mit de angere am Chare, dases vorwärts geit mitis. Merci für Di Ysatz, Aschi.


Paul Zürcher, zwöite Tenor

Es wyters Urgestei bi mwb24. Nid nume im zwöite Tenor profitiertme vo sire riesige Chorerfahrig u sis Wort wird im ganze Chor sehr höch gwichtet. - U wes drum geit, öppe mau es Konzert und Theater vomene angere Verein z bsueche, isch viufach ou är eine vo dene, wo die gschetztä Freichartene zuesech nimmt.


Walter Vetter, erste Tenor

Der Wale, üse Regisseur. Är treit sit es paar Jahr derzue by, dases nachde Konzärt bimne Theater no chly öppis z lache git. Mit syre lockere Art und sim grosse Humor isch är genau der Richtig für dä Job. U das Jahr gsehtmene sogar no ufder Bühni. Das wird sicher no grad einisch e chly lustiger. O aus Solosänger hetersech scho unger Bewiis gsteut. O das Jahr wieder. Me chönnt fasch sägä, är het grad chly e Louf, üse Wale.


Heinz Lehmann, erste Tenor

Der Henä isch o eine vo üsne Neo-Soliste. Är het die Fähigkeit zwar scho amne früechrige Konzärt unger Bewiis gsteut, aber das Jahr ischer eine vo dene, wo de würklech z vorderst vore steit. Löhtnech la überrasche, mir hei ömu aui mega Fröid. Und näbstem Singe isch o är eine vom Vorstant, u zwar aus Vizepresidänt. We auso der Beat mau nid ume isch, de steit är ir Pouse vor dra u redt. Süsch ischer nähmlech immer ganz e stiue hinger im erste Tenor... gäu Henä... Merci für Di Ysatz! ;-)


Hansueli Sturzenegger, erste Bass

Üse Jean-Jules isch o eis vo de Urgestei bi mwb24. Sis Wort het Gwicht u uf ihn wird glost. E Gniesser vode ruhigere Tön, wo aber abgeit wie d Füürwehr wes drum geit, mau es flotts Tänzli z schwinge. Sigs jtze ufder Bühni oder o nachde Konzärt zur Ungerhautigsmusig. Auso Froue, weder mau wieder mit eim weit tanze, wos würklech cha, forderetne uf, Dir wärdet stuune.


Walter Maurer, erste Tenor

Üse Wale vo Münsige isch eine, dä müesstme erfinde wesne no nid würd gäh. Immer gueti Luune u immer e flotte Spruch ufde Lippe. Ab u zue gheiter zwar usder WhatsApp-Gruppe u regtsech de uf, wiuer ja gar nüt drückt het. Aber är isch de aube schnäu wieder dinne. U mit syre charmante Art het är o immer es liebs u fründlechs Wort für syni Sängerkollege uf Lager. U wes öppis ztüe git im Chor, de steiter immer vore häre u bietet Hand. Danke Wale.


Peter Stettler, erste Tenor

Mit syre riesige Erfahrig im Chor und sire luschtige Art treit der Peschä massgäblech derzue by, dass üsi Show nid nume öppis für d Ohre, sondern äbä o öppis für ds Oug isch. U o aus Landwirt und Nachbar vo üsem Stammlokal het är scho öppe mau e Chare sprichwörtlech zum Dräck us gschrisse wo spät Nachts nüm isch vom Fläck cho.


Fritz Galli, erste Tenor

"Üse Fridu dä het e wunderschöne Schnouz" - so heissts im Lied "Üse Männerchor". U das wär jtz äbä är. D Farb vo däm Schnouz zeigt, dass o är e wäuts Erfahrig het bi mwb24 u mir si glücklech u froh, dass är trotz viune Engagements näbä mwb24 eine vo denä isch, wo fasch jedes Mau ad Prob chunnt. Und är isch dür sini Funktion aus "Bieröffner" natürlech o eine vode ganz wichtige Manne bi üs.


Alex Metzger, zwöite Tenor

Üse ehemalig "Calimero" treit mit sinere ungloublech grosse Bühneerfahrig u syre unverwächsubare Stimm massgäblech derzue by, dass üsi Gigs zu däm wärdä, wosi sy. Aus Multiinstrumentalist isch är o eine vo dene, wo die schwarze Pünkt ufde Notebletter chöi läsä u zämä mitem Vinc luegt är mit Argusouge druf, dass jedes Lied nid nume guet usgseht, sondern o schön tönt. Und sit däm Früelig isch der Alex aus Sekretär es wichtigs Mitglied vo üsem Vorstand. Merci für Di Ysatz, Alex.


Roland Schaffer, zwöite Bass

Der Rolä isch zämä mitem Tom König eine vo denä, wo närvös wird, wes am nüni no kes Bierli gäh het. Zudäm isch är dä wo luegt, dasses ufem WWW immer öppe chly öppis z läsä u z luege git vo mwb24. Sigs jtze uf Facebook, uf Instagram, uf youtube oder o hie ufder Homepage. Nid immer extrem schnäu, aber doch regumässig versorgt är die Kanäu mit entsprächende Infos.